የሰልፊ ፓለቲካ – በላይ ባይሳ


የፓለቲካ ርዕዮት የሚመነጨው ለሃገርና ለህዝብ እድገት ይበጃል ከሚል አስተሳሰብ ነው። ይህ አስተሳሰብ በማህበረሰቡ ውስጥ ከሚስተዋል ችግር ወይንም አዳጊ ፍላጎት አልያም ከሌላ ምክንያት ሊነሳ ይችላል። በመሆኑም አንድ ግለሰብ አልያም ድርጅት ከዚህ የሃሳብ ርዕዮተ-ዓለም በመነሳት ለማህበረሰቡ አበርክቶውን ለማሳካት እና ወደፊት መንግስት ለመሆን የሚያስችለውን የጠራ የፖለቲካ ፕሮግራም መቅረፅ መቻሉ ነው።

በላይ ባይሳ

ርዕዮተ-ዓለሙን እና የፖለቲካ ኘሮግራሙን ለማሳካት ራዕዩን ሌሎችን በማሳተፍና በማካፈል ተከታዮችን በማፍራት ጠንካራ አደረጃጀት መፍጠር ዋንኛ ተግባሩ ነው።

በፕሮግራሙ ህዝቡ አሁን ካለበት ኢኮኖሚያዊ፣ ማህበራዊ፣ ፓለቲካዊ እንዲሁም ቴክኖሎጂያዊ ቁመና እንዴት አንድ ደረጃ ወደፊት ማራመድ እንደሚችል የሚያቀርበው አማራጭ ምክረ-ሃሳብ ህዝቡን ማሳመን መቻሉ ነው። ፕሮግራሙ የህዝቡን ፍላጎት ከሞላ ጎደል የሚያሟላ ይሆናል ተብሎ ይታሰባል።

ጠንካራ ተቋማትን ለገነቡና በተነፃፃሪ “የዘመነ” የፓለቲካ ባህል ለገነቡ እንዲሁም በአንፃራዊነት ዲሞክራሲያዊ ምርጫ ለሚያካሂዱ ሃገራት አማራጭ የፓለቲካ ኘሮግራም በማቅረብ ለውድድር መቅረብ ምርጫ ሳይሆን ግዴታ ነው። የምትመዘነው ወደፊት ለሃገርና ለህዝብ ለመስራት በምታቀርበው አማራጭ ሃሳብህ ብቻ እና ብቻ ይሆናል ማለት ነው።

ፓለቲካ ሲዘምን ዲፎልቱ የፊት ማርሽ ላይ ሆኖ ክርክሩ ነገን የተሻለ ለማድረግ በሰዓት ስንት ኪሎሜትር እንብረር የሚል አይነት ነው። አንዱ በ80፣ ሌላው በ100፣ ልላኛው ደግሞ 120 እንፍጠን አይነት ክርክር ነው። ልዩነቱ ሲበዛ ደግሞ አንዱ ጎንደር ለመሄድ በሰላሌ ይሻላል ሲል ሌላኛው በደብረብርሃን ቢርቅም የተሻለ ነው እንደማለት ነው። የሁሉም የመጨረሻ ግብ ግን የሃገርና የህዝብን እድገት ማፋጠን እና ኑሮውን ማሻሻል ነው።

የሰልፊ ፓለቲካ ደግሞ ብዙ ነገሩ ከዚህ ተቃራኒ ነው። ዲፎልቱ የኋላ ማርሽ ነው። የኋሊት ጉዞ ደግሞ ምንም አይመችም። ሁሉን ወደኋላ እያሳየ ራሱንም፣ ሃገርንም ህዝቡንም እጅግ ያንገላታል። አለፍ ሲልም ያጋጫል። ምትክ የሌለውን የሰውን ልጅ ህይወት ይነጥቃል።

በሰልፊ ፓለቲካ ርዕዮተ-ዓለምም ሆነ የፖለቲካ ኘሮግራም መሰረት የሚያደርገው በወደፊት ላይ ሳይሆን በትላንት ላይ ተቸንክሮ ነው።

በእርግጥ የኋላው ከሌለ የፊቱ አይኖርም እንደሚባለው ትላንት ለነገ መሠረት መሆኑ እሙን ነው። ይሁን እንጂ ትላንት ታሪክ ሲሆን፣ ዛሬ እውነት ሆኖ ነገ ግን ተስፋ ነው። ተስፋ ደግሞ የመኖር እና የህይወት መሠረት ነው።

ፓለቲካንም ሰው ሰው እንዲሸት የሚያሰኘው ታሪክን እንደ መማርያ፤ መጪውን ጊዜ ደግሞ በይቻላል መንፈስ አሻግሮ ካሳየ ብቻ ነው። ከዛ ውጪ ፓለቲካ ደረቅና እንጨት እንጨት የሚል ይሆናል። ጨው እንደሌለው ወጥ ጭምር አይመችም።

የፓለቲካ ርዕዮት ከትላንቱ ተምሮ ትኩረቱ የወደፊቱ ላይ ሲሆን ነው ማህበራዊ ለውጥ የሚያመጣው። ተራማጅ አተያይና አርቆ ተመልካች አስተሳሰብ እና ስብዕናም ስትጎናፀፍ ነው ለሃገር መዳኛ ለህዝቡም መድሃኒት የምትሆነው።

ሁል-አቀፍ እና አሳታፊ ገዢ የፖለቲካ የሃሳብ ልዕልና ማማ ላይ ለመድረስ ትላንት ላይ ተቸክሎ በማላዘን ዛሬ በእጁ ያለውን ወርቃማ ጊዜ ሳያበላሽ ለነገ መትጋት ሲቻል ነው።

የሰልፊ ፓለቲካ አዙሪቱ ልክ እንደ ሁለት ግራ እግር ጫማ ግራ የገባው የፓለቲካ አስተሳሰብ ነው። በትክክል የማይገባ እና የማይመች አካሄድ።

የሰልፊ ፓለቲካ ብቃት ሳይሆን የጅምላ ጩኸት፣ የጠራ የፓለቲካ ርዕዮትና ኘሮግራም ሳይሆን ጨበጣ (shooting in the dark)፣ ለውጥን ሳይሆን ነውጥን የሚያቀነቅን፣ በሃሳብ ሳይሆን በመንደር፣ በራዕይ ሳይሆን በድንግዝግዝ ቅዠት፣ በስሌት ሳይሆን በስሜት፣ በሃሳብ የበላይነት ሳይሆን በነሲብ ወዘተ… በሽታ የተለከፈ ነው።

የሰልፊ ፓለቲካ ዋንኛ መገለጫው ትላንት እንዲህ ሆንክ እንጂን ነገን እንዲህ ትሆናለህ አለያም ይሄን አደርግልሃለሁ የሚል ወደፊት ተስፋ አያሰንቅም። መርዶ እንጂ ብስራት የለውም። የኋሊት ጨለምተኛ ጉዞ ብቻ ነው። የፊትለፊት እይታህን የሚጋርድ የተዛባ አተያይ ጭምር።

የሃገራችን ፓለቲካ ደግሞ ተደጋግሞ በሰልፊ ደዌ የተመታ ነው። የሃገረ-መንግስትና እና የህብረ-ብሄራዊ ግንባታ ብሎም የማንነት ጥያቄዎች በተገቢው መልኩ ስላልተሰራባቸው ነው ሁሌ የሚያወዛግቡት።

በዚህ ምክንያት የ”ፓለቲካ ፖርቲዎች”ም በአብዛኛው በሚባል ደረጃ የሰልፊ ተጠቂ ናቸው። አባላቶቹም በተመሳሳይ። ለዚህም ይመስላል ከአዙሪቱ መውጣት ያልቻለው። ይህን ስል ግን ቁጥራቸው ቢያንስም ሀገራዊ ሃላፊነት የሚሰማቸው ፓርቲዎች እንዳሉም ልብ ይለዋል::

ታድያ ጥያቄው መፍትሄው ምንይሁን ነው?
መፍትሄው አንድ እና አንድ ነው። እሱም ከሰልፊ ፓለቲካ መፋታት ብቻ ነው።

ትላንት ታሪክ ሲሆን፣ ዛሬ እውነት ሆኖ ነገ ግን ተስፋ ነው! ሰልፊ ደግሞ ትላንትን ብቻ ወደሗላ የሚያሳይ::
በላይ ባይሳ
ጥር 24/2013 ዓ.ም

Related posts:

መንግስ የጸጥታ ሃይሎች ለየትኛውም ዓይነት ትንኮሳ ምላሽ ለመስጠት ዝግጁ ማድረጉን አስታወቀ
በትግራይ 5.2 ሚሊዮን ሕዝብ ዕርዳታ እየደረሰ ነው፤ ከሺህ በላይ የጭነት መኪኖች ታግተዋል፤ 76 ቢሊዮን ብር ወደ ትግራይ ተልኳል
የደህንነት ጥናት አዲሱ ምዕራፍ - ጂኦስፓሻል ኢንተለጀንስ
ዳግም ጦርነት እንዳይጀመር ስጋት የገባው ኢሰመኮ የማስጠንቀቂያ ጥሪ አሰማ
"ህሊናን የሚፈታተን" የተባለ ሪፖርት ይፋ ሆነ - አማራ ክልል በተወረረበት ወቅት ግብረርሰዶም መፈጸሙ ተገለጸ
ፊንላንድ 3.6 ሚሊዮን ሕዝብ የሚይዙ ዋሻዎች አዘጋጀች - ለኢትዮጵያውያን ጠቃሚ የጥንቃቄ መረጃ
"አሸባሪው የትግራይ ወራሪ ቡድንና የጥፋት ኃይል ዳግም ከሞከረ የማያዳግም ቅጣት ይጠብቀዋልʺ
ሻዕቢያና ትህነግ - ሰሞኑን ይህ ሆነ
ትህነግ ጦርነት እንደሚከፍት ይፋ አደረገ፤ አማራ ክልል "ለክተት ተዘጋጁ"አለ፤ መከላከያ በተጠንቀቅ ላይ ነው
ወልቃይት "የወር ስንቅህን አዘጋጅተህ ለክትተ ጥሪ ተዘጋጅ”
በሶማሊያ በሚንቀሳቀሰው አልሸባብ የሽብር ተልዕኮ የተሰጣቸው ስድስት ግለሰቦች በቁጥጥር ስር ዋሉ
አማራ ክልል ትህነግ ዳግም ጦርነት ስላወጀ የ"ዝግጁነትን" አዋጅ አወጣ
ኡጋንዳ ፀረ-ኢትዮጵያ ለሆኑ ሃይሎች ከለላና ድጋፍ እንደማታደርግ አስታወቀች፤ የሚወራው ሃሰት ነው አለች
በአገር አቋራጭ የሕዝብ ትራንስፖርት አገልግሎት ላይ የትራንስፖርት ታሪፍ ማሻሻያ ተደረገ
በዳኝነት ስርአቱ ላይ የሚታዩ የሙስና ተግባራትን ለመከላከል የሚያስችል ስትራቴጂ ይፋ ሆነ

Leave a Reply