አማራ ክልል “የህግ ማስከበሩ ይቀጥላል”

ፎቶ – በወረራ ወቅት ቤተሰባቸውን ታጡ አባት

የአማራ ክልል መንግሥት ኮሙኒኬሽን ቢሮ ዛሬ ባወጣው መግለጫ መንግሥት ሕግና ሥርዓትን የማስከበር ግዴታውን ለመወጣት ሕግን አክብሮ የሕግ የበላይነትን ለማስከበር እንደሚሠራ አስታውቋል።

የመግለጫው ሙሉ ሀሳብ እንደሚከተለው ቀርቧል።

አሸባሪው የትህነግ ቡድን በሰሜን እዝ የሀገር መከላከያ ሠራዊት ላይ ጥቃት መሰንዘሩን ተከትሎ የተደቀነብንን ህልውናችንን እና ሉዓላዊነታችንን የማጣት አደጋ ለመቀልበስ ስንል ሙሉ ትኩረታችንንና ሁለንተናዊ አቅማችንን ተገደን በገባንበት ጦርነት ላይ አውለናል።

ስለ ህልውናችን እና ሉዓላዊነታችን መከበር ሲባል የከፈልነው መስዋእትነት በአይነቱም ሆነ በመጠኑ ያለው ዋጋ ከሀገር አንድነት፣ ክብር እና ቀጣይነት አንጻር ሲታይ ተገቢም አንገብጋቢም ነበር።

በመሆኑም መደበኛ የሆነውን መንግሥታዊ ኃላፊነቶችን ለመወጣት መደበኛ ያልሆኑ አሠራሮችና አደረጃጀቶችን ጭምር በዘመቻ ለሕልውና ሂደት ውስጥ መጠቀም አስፈላጊና የተሻለው አማራጭ በመሆኑ በጦርነቱ ሂደት ውስጥ ተተግብሯል።

በውጤቱም በአሸባሪውና ወራሪው የሕወሃት ቡድን አማካኝነት እንደ አማራ ሕዝብ የተደቀነብንን ሕልውና እና እንደ ሀገር ሉዓላዊነታችንን የማጣት አደጋ ለመቀልበስ አስችሎናል፡፡ በዚህ ታሪካዊ ሁነት ውስጥ ስለሕዝባቸው ደኅንነትና ስለ ሀገር ሉዓላዊነት ሲሉ መሰዋእትነትን የከፈሉ ሁሉ ሰማእት የሆኑለት ሕዝብ እና ሀገራቸው ዘንድ በዘላለማዊ ክብር ሲታወሱ ይኖራሉ።

በአንጻሩ ደግሞ የአማራ ሕዝብ ከህወሃት በኩል የተሰነዘረበትን ቀጥተኛ ጥቃት ለመቀልበስ በጦርነት ሂደት ውስጥ የነበረበትን ወቅት እንደመልካም አጋጣሚ በመጠቀም ከአማራ ሕዝብ ሕልውና ቀጣይነት እና ከሀገራቸው ሉዓላዊነት መከበር ይልቅ የግል ጥቅማቸውን ማስቀደም መርጠዋል።

በምርጫቸውም መሰረት ለውጫዊ ጠላቶቻችን ተላላኪ በመሆን በሰርጎገብነት፣ በህገ ወጥ ድርጊትና የአፈና፣ የዝርፊያ፣ የኮንትሮ ባንድ ንግድ፣ የህገወጥ የጦር መሳሪያ ዝውውርን ጨምሮ የግድያ ወንጀሎችን አንሰራፍተዋል።

በአማራ ክልል ውስጥ ሁከት፣ ብጥብጥ እና ስርዓት አልበኝነትን በማስፈን ሕዝብ እንዳይረጋጋ እርስ በርሱ እንዲጋጭና አንድነቱን እንዲያጣ የሚያደርጉ ተግባራትን በመፈጸም ራሳቸውን በአማራ ሕዝብ ጉያ ውስጥ የወሸቁ ውሥጣዊ ጠላቶች ሆነው ተገኝተዋል።

የአማራ ሕዝብ በውጭ ጠላቶቹ እንዳይገረሰስ የተዋደቀለትንና እንደ ሕዝብ ያለውን ሕልውና ለማሳጣት ሕገ ወጥነትንና ሥርዓት አልበኝንት በክልሉ ውስጥ እንዲንሰራፋ የማድረግን አፍራሽ ዘዴ እንደ ትግል ስልት ሲጠቀሙበት ተስተውለዋል።

በእነዚሁ አካላት አማካኝነት በሁሉም የክልላችን አካባቢዎች የተፈጸሙት የሕገወጥ እና ሥርዓት አልበኝነት ድርጊቶች መበራከት የተንገሸገሸው መላው የክልላችን ሕዝብ መንግሥት የህግ የበላይነትን እንዲያስከብር በተደጋጋሚ ጊዜ ጥያቄ አቅርቧል።

ለዚህ ጥያቄ ተገቢ ምላሽ ለመስጠት መንግሥት በተጠና ሁኔታ ተገቢውን ምርመራና በቂ ዝግጅት በማድረግ በክልሉ ውስጥ ሕግና ሥርዓትን ለማስከበር ሕጋዊ የእርምት እርምጃዎችን እየወሰደ ይገኛል።

መንግሥት የሕግ የበላይነትን ለማስፈን እያከናወነ የሚገኘው ተግባር በትእግስት፣ በሰከነ እና በህጋዊነት ላይ የተመሰረተ እና ማስተማርን ያስቀደመ እንዲሆን ያላሰለሰ ጥረት አድርጓል።

በዚህም ሂደት በርካታዎቹ መንግሥትን አዳምጠውና ክልላዊ ሁኔታችንን ተረድተው ከድርጊታቸው ተቆጥበዋል።

ከጥፋት ድርጊቶች ከመቆጠብም ባሻገር ከመንግሥት እና ሕዝብ ጎን በመቆም ለገጠሙን ችግሮች ሁሉ የመፍትሔ አካል ሆነው እየሠሩ ይገኛል።

በተቃራኒው አንዳንዶቹ ደግሞ በሃይማኖት አባቶችና የሀገር ሽማግሌዎች ጭምር ለማስመከር የተደረገውን ጥረት እንደ ደካማነት በመቁጠር ከተሰማሩበት የህገወጥነትና ሥርዓት አልበኝነት እንቅስቃሴዎች ለመታረም ፍቃደኛ ባለመሆናቸው መንግሥት ህግና ሥርዓትን የማስከበር ግዴታውን ለመወጣት ህጋዊ አሠራሩን ተከትሎ የህግ የበላይነትን ለማስከበር በትኩረት እንዲሠራ አድርጎታል።

በአሁኑ ወቅት መንግሥት የሕግና ሥርዓትን የበላይነት ለማረጋገጥ ካልተቻለው ታሪካዊ የውጭ ጠላቶቻችን እየደገሱልን ያለውን የጥፋትና የጦርነት ድግስ በአንድነት ቆመን ለመቀልበስም ሆነ የሕዝባችንን ዘላቂ የልማትና የሰላም ጥያቄዎች ምላሽ እንዲያገኙ ለማድረግ የሚቻልበትን እድል ከማምከኑ ባሻገር በሁለንተናዊ መስዋእትነት የተጠበቀውን እና እንደ ሕዝብ ያለንን ሕልውና ሊያሳጣን ይችላል።

በመሆኑም እየተከናወነ የሚገኘው የህግ የበላይነትን የማረጋገጥ መንግሥታዊ ተግባር በዓላማው፣ በሂደቱም ሆነ በውጤቱ የሕዝብ እና የሀገር ደኅንነትን ለማረጋገጥ የታለመ መሆኑን በመገንዘብ መላው የአማራ ሕዝብ ሕግ እና የሕግ የበላይነትን ለማስከበር ለሚደረገው ጥረት ሙሉ ውግንናውን በመስጠት ውስጣዊ አንድነቱን አጠናክሮ ሊያስቀጥል ይገባል።

Leave a Reply